Gaman að fá bronsið í dag. Héldum haus á móti Pólverjunum. Við erum með annað besta liðið í heiminum í dag, svo einfalt held ég að það sé. Það var hending ein sem réði því að við spiluðum við Frakkana í undanúrslitunum en ekki í la grande finale. Við erum með alla vega jafngott, ef ekki betra lið en Króatía og öll hin liðin.

 

Jæja, annars er minns kominn á gott skrið með að prjóna eitt stykki lopapeysu. Allt að koma, meira að segja búinn að tengja ermar við bol og er að byrja á munstri á öxlum. Hef náttúrlega prjónað helling af húfum, hosum og vetlingum og fannst tími til kominn að skella mér á peysu. Valdi gott munstur í Lopablaði númer 29 og dreif í þessu. Keypti prjóna og garn og hófst handa. Svo held ég að galdurinn sé að nota tímann eins vel og mögulegt er. Horfi orðið ekki lengur á sjónvarpið án þess að vera með prjóna í hönd. Finnst annað orðið tímasóun, nema myndin sé þeim mun hrikalega betri.

 

Júmsepípoj. Hvernig væri að fara að blogga reglulega? Nei, held mig við svona handahófskenndar færslur. Þetta er sennilega ekki til að fjölga lesendum, en hefði ég áhuga á því þá myndi ég byrja að svara "fréttum" á mbl.is í gríð og erg. Hef ákveðið að láta vitleysuna þar á bæ ekki taka meiri tíma af mínu lífi. Les þó flippið en smelli ekki á hlekki ef fyrirsögnin er furðuleg eða er ekki lýsandi. Að auki er ég hættur að skoða fréttir um samband Brad Pitt og Angelinu Jolie. Þar tókst mér að spara góðan tíma.

Hvaða kröfur eru gerðar til penna á mbl.is? Að auki má spyrja sig að því hvort greinar séu yfirfarnar áður en þær eru birtar. Slíkt ætti ekki að taka mikinn tíma og myndi forða höfundinum, eða öllu heldur [oft lélegum] þýðandanum, frá hneisu:

"Til er þjóðsaga á svæðinu sem hermir að menn og drekar afkomendur tvíbura og að því hafi þeir lifað öldum saman í sátt og samlyndi."

Á milli orðanna "afkomendur" og "tvíbura" er tvöfalt bil og því grunar mig að þar eigi fleyg orð að koma í stað eyðu. En þessi setning lítur ákaflega illa út. Hér er væntanlega verið að þýða grein og höndunum kastað til verksins.

Svona stíl á ekki að greiða há laun fyrir. Kannski er það vandinn. Jæja, þetta verður síðasta færslan mín um þessi mál. Er búinn að eyða, já EYÐA, allt of miklum tíma í þetta bull; bæði við lestur upphaflegu greinarinnar sem og við þessi skrif.

B

	Drekaeðlur ráðast á fólk
Ábyrgðarmaður færslu Tilkynna um óviðeigandi tengingu við frétt

Nei, grín. Ég er ekki kominn með skalla en hins vegar var ég skallaður í fótboltaleik fyrir skömmu. Fékk þetta líka fína glóðurauga. Náði að koma í veg fyrir mestu bólguna með því að kæla þetta af og á í tvo tíma. Hins var ég skallaður á kinnbeinið og því bólgnaði ég ansi mikið að innan og gat því varla opnað munninn. Borðaði af þeim sökum aðeins jógúrt og ávaxtadrykki í tvo daga. Er þó að jafna mig og get borðað dauð dýr á ný.

 

Sá Barcelona mala Real Madrid á laugardaginn síðasta. Hvílíkur leikur! Var staddur á breskum pöbb með Grace og Tomàs. Allt ætlaði um koll að keyra þegar mörkunum var raðað inn. Gríðarlega gaman að horfa á svona leiki með öðru fólki.

Heima er best. Kominn til landsins og nýt snjósins í botn. Spilaði á píanóið mitt í dag enda búinn að sakna gripsins. Nokkrar flugur hafa verið hnýttar og hlustað á góða músík. Eldaði í kvöld fjórar bleikjur og tókst fantavel til. Svo má jólamaturinn fara að vara sig, sem og nammið...

Alveg magnað að Obama karlinn hafi náð kjöri. Og það með yfirburðum. Fór í afmælis-/kosningateiti hjá einni stelpu í deildinni og var skálað í kampavíni þegar ljóst var hvert stefndi. Mjög skemmtilegt kvöld. Einnig var getraun þar sem fólk átti að lita fylking rauð eða blá eftir því hvorum frambjóðandanum þau féllu í hlut. Er skemmst að segja frá að ég var (ásamt tveimur öðrum Könum) efstur á lista þar sem aðeins skeikaði einu fylki. Þar sem ég er ekki frá Ameríkulandi þá finnst mér ég hafa unnið.

 Annars voru magnaðir skógareldar hér í síðustu viku. Á meðfylgjandi mynd má sjá hversu heitt okkur varð! Nei, bara grín. Þetta er ekki húsið okkar en aftur á móti er þetta hús bara rétt hjá miðbæ Santa Barbara. Frekar spúkí að yfir hundrað heimili í Montecito (þar sem Oprah og John Cleese eiga heima) hafi brunnið til kaldra kola. Hann Rob Lowe missti víst húsið sitt, greyið.

 

Á fimmtudaginn fengum við á Coolbrook lane okkar fyrsta flóttafólk. Helmingur stelpnaskarans úr Hausdorff (gælunafn hússins þeirra) gistu hjá okkur þar sem mikill reykur og aska gerði það að verkum að óþægilegt var að anda inni hjá þeim. Þær Ellie (í stærðfræðideildinni og er kærasta Jons sem leigir með okkur) og Sonja (önnur stelpa í stærðfræðinni, eða réttara sagt kona þar sem hún er yfir þrítugt hehe), gistu hjá okkur á fimmtudaginn. Við fengum reyndar eitt stykki kött í þokkabót en honum skelltum við inn til Jons svo að hann skítaði bara út teppið hjá honum. Nei, ég segi nú bara svona. Kötturinn er fínn, hann skiptir hins vegar um öll líkamshár á um það bil viku fresti.

 

Er byrjaður að spila tennis við liðið í deildinni og gengur frekar illa. Held að ég hafi verið betri í Svíþjóð þegar ég var 7 ára.